Sarat sin pagsaksi pa tuhan لا اله الا الله

Pangadjian;

Ibn Shaakir

     Bismillahi wassalatu wassalamu 'ala man laa Nabiyya ba'dahu.

Unu in hati sin Kalimah لا اله الا الله iban unu in mga kasharat-sharatan  (Conditions) niya?

In hati sin kalimah لا اله الا الله: Tantu wairu’un mapatut sumbahun, mapu’as in Allah.

     Mayta' kita nag usal sin kabtangan “ mapatut sumbahun ” bukun na sadja’ “ wairu’un susumbahun , mapu’as in Allah ” ? Lawng sin manga ‘Ulamah sin Islam, pasalan mata’ud siyusumba sin manusiya' dugaing daing ha Allahu Ta'aala. Hangkan iyusal natu' in kabtangan “ mapatut sumbahun ” , ampa in “ mapatut sumbahun ” amu na in Tuhan sabunnal, Allahu Subhanahu wa Ta'aala.

Unu na man in kasharat sharatan (Conditions) sin kalimah لا اله الا الله?

Laung sin manga ‘Ulamah sin Ahlus-Sunnah, pitu ( 7 ) in shurut (Conditions) sin kalima La ilaha illallah:

1.)العلم  ( Al-'ilmu ): Amuna in pangingat mu ha unu in kiyandutan sin kalima لا اله الا الله. Hati niya, ingatun mu in Nafiy iban Isbat sin kalimah لا اله الا الله . Hasupaya ka-ingatan sin pangatayan in piyamung sin dila'.

Unu in hati sin nafi iban isbat?

In hati sin nafiy: Amuin napihan mu in katan susumbahun sin manusiya' duun ha kalimah لا اله

In hati sin isbat: Isbatun mu sin in mapatut sumbahun, tunggal in Allahu ta'aala, duun ha ruhul sin kalimah الا الله . Hati niya mapuas in Allah. In Nafiy iban Isbat, rukun (pillars) sin kalimah لا اله الا الله . Farman sin Allahu ta'aala, ha suwrah Muhammad, ayat 19:

قال تعالى:(فَاعْلَمْ أَنَّهُ لَا إِلَهَ إِلَّا اللَّهُ ) سورة محمد، الآية 19

Hati niya: " Ingata (O, Muhammad sallallahu alayhi wasallam) sin wayruun mapatut sumbahun, mapuas in Allah" Suwrah Muhammad, ayat 19.

     Nagsabda in panghu' natu' Muhammad (sallallahu alayhi wasallam): " Hisiyu-siyu in miyatay, ha hal kiyai-ingatan niya unu in hati sin لا اله الا الله , tantu tuud in siya tau Surga' " kiyariwayat hi Imam Muslim (rahimahullah)

2.) اليقين ( Al-yaqeen ): Amuin, subay sampurna' in kagawgut mu ha unu in hati sin kalimah لا اله الا الله, kagawgut sin bigi jantung ha pangingat kaniya, ha wayruun pagkutu'-kutu'/pag-utub-utub.

Farman sin Allahu ta'aala ha suwrah Alhujurat:

" Tantu tuud in mga bar-eiman sila in namamaratsaya pa Allah iban na sin da’ak niya, ha wayru’un pag duwa ruwa, iban in kiya-awnan sin manga alta’ iban ginhawa baran nila, piyag luwas lungsad nila ha karnai sin Allah, tantu tu’ud sila na ini in mga tau bunnal in pamaugbug “pa Allah iban na sin da’ak niya” ( alhujurat:25 )

     Iban nag sabda in Nabi Muhammad (Sallallahu alyhi wa sallam): " Saksi-an ku sin wairu’un mapatut sumbahun, mapu’as in Allah, iban in aku ini da’ak “ rasul ” daing ha Allah, hisiyu siyu in namaratsaya ha duwa ini, ha wairu’un pag duwa ruwa,tantu tuud in siya makasud sulga' " kiyariwayat hi Imam Muslim (rahimahullah)

3.) الاءخلاص ( Al-ikhlas ): Tulus ikhlas (mag-agad in kug iban baya' ) wayruun pagsakutu iban wayruun pagkutu'-kutu' kaniya. Farman sin Allahu ta'aala ha suwrah Az-zumar, ayat (3):

قال تعالى :( أَلَا لِلَّهِ الدِّينُ الْخَالِصُ..) سورة الزّمر، آية 3

Hati niya: " Tantu tuud in pag-agama ( sin mga manusiya' ), subay tulus ikhlas pa Allah ( isa-isa niya ) " ( Az-zumar, ayat 3 )

     Iban nag sabda in Nabi Muhammad (Sallallahu alyhi wa sallam): "
Tantu tuud in mga tau kuyagan sila sin pagshafa-at ku kanila ha adlaw mahuli. Amuin mga sila in pagkabtang nila sin kalimah لا اله الا الله, tulus ikhlas dayin ha laum bigi jantung nila " kiyariwayat hi Imam Al-bukhariy (rahimahullah)

4.) المحبّة ( Al-mahabbah ): Pagkasi iban pagkuyag ha kalimah لا اله الا الله.

Farman sin Allahu ta'aala, ha suwrah Al-baqarah, ayat 165.

قال تعالى : ( وَالَّذِينَ آمَنُوا أَشَدُّ حُبًّا لِلَّهِ..) سورة البقرة، آية 165

Farman sin Allah: " ..Iban in mga sila nagparatsaya ( mga bar-eiman ), landu' in kasi nila pa Allah.." suwrah Al-baqarah, ayat 165.

     Iban nag sabda in Nabi Muhammad (Sallallahu alyhi wa sallam): " Tu (3) parkala' hisiyu-siyu in makabatuk kaniya, tantu tuud kabakan niya in lanab sin pag-eiman ( subay labi in kasi niya pa Allahu ta'aala iban sin Rasul niya Muhammad sallallahu alayhi wasallam, dayin ha lasa niya pa katan kakasihan niya) ." Nag-ittifaq in duwa Imam, Bukhariy iban hi Muslim (rahimahumallah)

5.) الصّدق ( As-sidq ): Subay bunnal in pamaugbug ha kalimah لا اله الا الله, amuin pagsabunnal wayruun kamunafiqan.

Farman sin Allahu ta'aala, ha suwrah Al-ankabut, ayat 3:

قال تعالى : ( وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ) سورة العنكبوت، آية 3

     Farman sin Allah Ta'aala : " Iban bunnal tuud tiyandas namu' in naka-una dayin kanila, na' tantu tuud ka-ingatan da sin Allah hisiyu in bunnal ( in pamaratsaya ) iban tantu tuud ka-ingatan da sin Allah hisiyu in bukun bunnal ( in pamaratsaya niya) " Suwrah Al-ankabuwt, ayat 3

 

     Iban nag sabda in Nabi Muhammad (Sallallahu alyhi wa sallam): " Hisiyu-siyu in miyatay, ha hal in siya namamaugbug iban simasaksi' sin wayruun mapatut sumbahun ha kasabunnalan mapuas in Allah, iban in Muhammad (sallallahu alayhi wasallam) da-ak sin Allah (hati niya, in ka-awnan sin pamaugbug iban pagsaksi' niya tubud ha bigi jantung niya), tantu tuud nakasud niya siya surga'. " Kiyariwayat hi Imam Ahmad (rahimahullah)

6.) الاءنقياد ( Al-inqiyaad ) : Pagmalilla' ha katan kapatutan sin kalimah لا اله الا الله. In kapatutan sin kalimah ini amuna in mga hinang wajibaat ( obligatories ) hihinang mu karna' sin Allahu ta'aala, hasupaya karida-an kaw sin Allahu ta'aala.

Farman sin Allahu ta'aala, ha suwrah Az-zumar, ayat 54:

قال تعالى : ( وَأَنِيبُوا إِلَى رَبِّكُمْ وَأَسْلِمُوا لَهُ..) سورة الزمر، آية 54

Hati niya, farman sin Allahu ta'aala: " Iban Balik ( pagtawbat ) kamu pa Allah, iban pagmalilla' kamu kaniya " suwrah Az-zumar, ayat 54.

7.) Alqabuwll : pag tayma’ ha kalima La ilaha illallah , pasalan awn tau kayngatan iban hika kabtang niya in kalima La ilaha illallah, sumagawa’ bang awn mana’abbit kaniya pa ma’na sin kalima La ilaha illallah, mag mari' in ka’awnan niya.

Farman sin Allahu ta'aala: " In manga sila “ kafir ”, bang ta’abbitun pa kalima La ilaha illallah, mag takabbur in ka’awnan nila" ( alsaf-faat:35 ).

     In لا اله الا الله maluhay batbatun. Maluhay siya batbatun sin tau Munafiq, Fasiq, kaafir, Mushrik. Malayingkan di' nila kaingatan bang unu in maksud sin biyatbat niya amura in mga sila Mu'min (bar-eiman) gawgut in pamaratsaya nila pa katunggal sin Allahu ta'aala in makahati sin kamaksuran niya lamud na in ( 7 ) sharat nasabbut.

     Bang man natu' kabaugbugan in pitu Sharat (conditions) atawa lugut sin kalimah Laa Ilaaha Illallaah. Bang man kita niyu hidayatan sin Allahu ta'aala, maagad natu' in kabayaan sin Allahu ta'aala sin sampurna' pangagad wayruun pag-utu-utub, iban Sunnah sin Rasulullahi ( Sallallahu Alayhi Wasallam). Ameen ya Rabb...

     In kanuk-niyukan ( Essence/putti ) sin Kalimah Laa Ilaaha Illallaah Muhammad Rasuwlullah, amuna in, pagtag-eipun ( pag-ibadat ) IKHLAAS pa Allahu Ta'aala tuput tunggal isa-isa niya, ha way pagsakutu sarta' way pagkutu'-kutu kaniya, iban papag-atapun ( papagsibu-un ) in pagtag-eipun ( pag-ibadat ) ha SUNNAH sin Rasulillahi ( Sallallahu Alayhi Wasallam ). Unu-unu ibadat wayruun ka-ikhlaas iban way imatap ha Sunnah sin Rasulullahi ( Sallallahu Alayhi Wasallam ), tantu tuud DI' taymaun sin Allahu Ta'aala. Subay in duwa yan DI' magbutas.

Wallahu Ta'aala A'lam.