Tungud ha Pagpuasa aun ujul niya

Pangadjian:
Aryam Alpasain

     * السلام عليكم و ر حمة الله و بر كاته*¤ Manga kaguruhan namu' kalasahan, pagbarakatun sin Tuhan iban halaum sin bilik-bilik ini Advance Ramadan Kareem knyu katan.  Aun aku sual ini pasal ha

1. Tau aun sakit sakali nagpuasa ha adlaw man simuka, giyuwaan dugu' sa' tuy  da man in pagpuasa niya, biyadiin yadtu?
2. Di' magsambahayang ha kahaba' waktu, pasal makatarasaw(distured) kunu' in tug bat di' kananaman in hapdi'. Unu in hukuman sin bhaini?
3. Di' baha makaba'tal mangiskis(toothpaste) bang adlaw? 

     Maap man biya' napahaba, diyaak hadja aku mangasubu mari. Salam kasilasa matun kaniyu way bugtu.

Jawab:
Tadjuk Lawihan

     Wa alaykum mussalam wa rakhmatuallahi wa barakatuhu...

1.) In tau tagasakit apabila in sakit niya hikamula kaniya atawa hikasung sin sakit niya, na, in Agama Islam wala' na siya diyaak papagpuasahun, sa' bang siya kaulian na papagantian sadja kaniya, Parman sin Allahu Ta'ala:

{ وَمَن كَانَ مَرِيضًا أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللّهُ بِكُمُ الْيُسْرَ وَلاَ يُرِيدُ بِكُمُ العسر (185) سورة البقرة

"Iban hisyu-siyu in kaawnan niya tagasakit atawa hatulakan (sakali nakabuka' siya), na, gantian niya ha dugaing adlaw, in kabayaan sin ALLAHU TA'ALA kaniyu amuna in kaluhayan kamu iban di' biya kabayaan in kasigpitan kamu" (Al-Baqarah: 185)

     Tungud ha pangasubu mu, laung sin manga Ulamah bang tuurun niya sumuka in yan makaba'tal sin puasa, sa' bang niya di' tuurun, na, in yan dih makaba'tal sin puasa. Sumagawa' bang biya' sin nasabbut mu dugu' in mag guwa' ha pagsuka niya sakali in gimuwa' ini masi-masi sambil agun-agun hikamula na kaniya, na, labi maraw(afdal) in ba'talun niya na in puasa niya sabab biya' na sin nasabbut ta ha ayat yan sin makajari na siya di' mamuasa.

2.) Bang in tau nagpuasa ha Ramadan di' siya magsambahayang lima waktu, unu in paidda sin pagpuasa niya? 

     Bang hakaibanan Ulamah mahukum siya Kafir sabab sin paninggali niya sin salaggu'-laggu' pardaakan sin Allahu Ta'ala. In kawajiban sin mau-maas sin tau yan subay siya nasihatan, pahatihun sin bukun kakahinang sin hambuuk Muslim in nahinang niya, iban subay siya magtawbat dain ha I'tiqad bihayan.

3.) In magpangiskis(toothbrush) mag-sal toothpaste di' makaba'tal sin puasa bang niya di' da tuurun kaunun in toothpaste. Adapun in nanam makapin halaum sin simud niya in yan di' makaba'tal.

 wallahu a'lam...