Abu Al-fawzaan
Salam pa manga kaguruhan namu kalasahan. Pangasubu, unu in hukuman sin pagduwa'a ha sujud hikahinapusan? Pasal duun aun hadith in magsulng(conflict) bang kita magduwa'a magpalugay ha kahinapusan (last) sujud. Unu mahukum ta yadtu bida'a(kakahinang ba'gu)? Pasal sulang ha Sunna. In pangasubu aun ka hadith tuud sin subay hadja ha hikahinapusan sin sujud? Magsukul... Tumagad..
Jawab:
Abu AbdirRahmaan
Bismillaah walhamdulillaah was salaatu was salaamu 'alaa rasuwlillaah. Sabda sin rasuwlullaah sallallaahu 'alayhi wa sallam:
"أقرب ما يكون العبد من ربه وهو ساجد فأكثروا الدعاء"
"Sasu'uk-su'uk in ka'awnan sin iypun ha Tuhan niya ha waktu in siya nagsusujud, na, pata'ra niyu in pagduwa'a" [SAHEEH MUSLIM].
Nasabbut hi Imaam Al-Albaaniy(rahimahullaah) ha kitab niya sifat as-salaati an-nabi in hambu'uk hadeeth namayta'i sin nakahaba' in pagsujud sin Rasuwlullaah (sallallaahu 'alayhi wa sallam) ha karna' aun kimura' ha taykud niya bata'-bata', way siya timunga ha karna' piya'ubus niya in bata'-bata' naglangug/ nagkura'-kura' ha taykud niya, in ini dalil sin pagmarayaw ha bata'-bata', bukun biya' sin paghinangun sin ka'ibanan lubakan in bata'-bata' bang simasaw ha sambahayang sin kama'asan. na, ingatun natu' in sunnat ha supaya di' kita niyu makapangla'ug misan ha bata'-bata'.
Daing ha sabab yan, siyara' in magpahaba'/ magpata'ud sin duwa'a ha pagsujud labi-luba' na bang isa-isa mu. Adapun bang kaw Imam lagi' aun manga mala'as ma'mum mu atawa di' ta ka'ingatan aun manga barhajat, na, labi marayaw in di' magpahaba', ha karna' pagmartabbat kanila.
Way hadith namayta' sin subay in magduwa'a ha kahinapusan sin pagsujud ha sambahayang, wallaahu a'lam, bang saupama awn hadith naa' way ku nabassa in yan bayta'i niyu aku. wa jazaakumullaahu khayran.
Wallaahu a'lam bissawaab.
