Tungud pa tuw(3) parkala' sin Nafsu

Pangasubu:
Shariefa Bint Nadzmie

     Assalamu alaykum pa manga kaguruhan namu' di ha sual iban jawab sarta' da na in manga kataimanghuran ha tiranan. Aun kami pangasubu.

     Aun kami diyungug ha tungud sin nafsu. tuw(3) parkala' kunu'? Unu naman baha' yadtu? iban mabaya kami hatihun in maksud sin nafsu. Mabaya tuud kami humat sarta' mangayu' kami kamaapan kaniyu bang in pangasubu namu' wala' imamu..Salamduwa'a magsul.

Jawab:

Ibn Shaakir

Wa alaykumussalam warahmatullahi wa barakatuhu Sis Shariefa.

     In Tuw(3) NAFSU yan ha pangasubu mu, manunjuki pa parkala' Niyawa, nasabbut halaum sin Qur-an, amuna in mga ini:

• 1.) Nafsul-Mutmainna - Niyawalihan sawasa' (malanu') in laum pa guwa' sin ginhawa baran ha pagtag-ipun (pag-ibadat) pa Allahu Ta'aala.

In ginhawa sutsi ini muwi' siya halaum karidaan sin Allahu Ta'aala, ha farman niya ha Suwrah Al-fajr, ayat 27-30:

يَا أَيَّتُهَا النَّفْسُ الْمُطْمَئِنَّةُ (27) ارْجِعِي إِلَى رَبِّكِ رَاضِيَةً مَرْضِيَّةً (28) فَادْخُلِي فِي عِبَادِي (29) وَادْخُلِي جَنَّتِي (30)

Hati niya: "O kaw ginhawa sawasa' (ha pag-ibadatan kakuh), balik nakaw pa tuhan mu (Allahu Ta'aala) sarta' iban rida' mu sin tutungbasan niya kaymu, damikkiyan in tuhan mu halaum rida' daisab kaymu, sud nakaw pa jumlahan sin mga eipun ku (Saliheen), sud nakaw pa surga' ku"

• 2.) Nafsul-lawwama - Ha bahagi-an ini, nag-ikhtilaf (Disagreement) in mga Ulama' nagma'na kaniya. Laung sin kaibanan "Attalawwum" Attaraddud, hati niya, makahinang mangi' ubus magtawbat na isab.

Laung isab sin kaibanan: Pagsusun (Ikhtilaf na isab nagma'na kaniya), bang siya tutug ha pagka-mu'min niya, bima'na daran niya bibista in baran niya. Atawa saplag siya pa katan: "In Muhmin susunun niya in ginhawa niya bang makahinang mangi'. In bukun Mu'min, susunun niya in ginhawa niya ha pagma'siyat pa Allahu Ta'aala".

• 3.) Annafsu ammaratun bissuw' - Amuna na ini in ginhawa sangi'-ngi' dayin ha manusiya', in panun niya shaytan, jiyajanji-an siya sin mga angan-angan puting, ampa siya pahinangun kaba'talan iban da-akun siya maghinang mangi'.

Hadith sin Rasulullahi (sallallahu alayhi wasallam), riwayat daying kan Ibnu Mas-'ud (Radiyallahu anhu), sabda sin Rasulullahi (sallallahu alayhi wasallam):

"Sabunnal tuud in Shaytan awn susun niya ha Anak apu' Adam, damikkiyan in Mala-ikat awun da isab susun niya ha Anak apu' Adam, adapun in susun sin Shaytan, amuna in janji-an niya kaw sin mangi' iban papanghimutingun niya kaw ha kasabunnalan. In susun sin Malaa-ikat, janjian kaw pa marayaw iban papanghimunnakunun kaw sin kasabunnalan, hisiyu-siyu in kabakan niya amun susun sin Malaa-ikat, na' ingatun niya sin in yaun daying ha Allah, ampa siya magsarangsukul, bang in kabakan niya amun hambuuk, na' subay siya magpatilibun (pa Allah) dayin ha Shaytan". (Kiyariwayat hi Nassaa'i iban hi Tirmidhi, kiyapaguwa' hi Ibnu Hibban)

Wallahu a'lam bissawab...

Ganap pagpasawa ha tungud sin Nafs:

Ha bahasa arab in nafs mataud in ma'na niya:

1. Nafs - Magma'na siya ruuh (nyawa), biya'na sin imiyan kaw: kharajat nafsuhu: bima'na:gimuwa in nyawa niya, amuna in mawafat.
2. Nafs -  Magma'na siya Dugu', biya'na sin nasabbut ha hadith: (maa-laysa lahu nafsun sa-ela fa-innahu la yanjusil-maa' iza mata fiyhi) unu-unu na in wayruun siya dugu mag-anud na sabunnal tuud dih siya lumummih in tubig bang siya mapatay ha lawm niya.
3. Nafs -  Magma'na siya jasad, biya'na sin nasabbut ta.
4. Nafsus-shayi' (نفس الشيئ ) -  zat sin hambuuk unu-unu atawa haqiqa niya.
5. Annafas - Amuna in hangin magsud magguwa' ha ilung ta.

Adapun in magkasabbut ha laum qur'an, amuna in nasabbut ta ha taas yan, sumagawa' ganap hadja pagpasawa:

Laung Ibn Katheer (Rahimahullah): Dih siya matawag NAFS bang siya bukun himahambuuk pa jasad, bang siya makaguwa' na dain ha jasad (hati niya, mawafat na) Ruuh na in pagtawag kaniya.

In nasabbut ta ha taas, amuin bahagi-an sin Nafsu:

1. Annafs al-mutmainna
2. Annafs allawwama
3. Annafs ammara bissu'

Laung hi Ibnu Qayyim (rahimahullah): In mga ini sifat hadja siya sin Nafs, adapun inkasabunnalan niya hambuuk da. Bang in hambuuk tau daruhaka' way pag-eiman niya pa Allahu Ta'aala, in sifat sin nafs niya, amuna in Ammara bissu'. Bang siya magtawbat na, sah magpakahinang da siya bukun marayaw ubus makabatuk na isab magbalik in sifat sin Nafs niya lawwama, bang siya makusug na mag-ibadat sarta' hiyaharap niya na sadja in pagtaat pa (Allahu Ta'aala), hati niya, limabi na in pag akhirat niya dain sin pag dunya niya in sifat sin Nafs niya, amuna in Mutmainna.

Wallahu a'lam bissawab.