Pagpatanug duwa'a

Pangasubu:

مرسة أيوب

Assalaamu Alaikum! Pa mga kaguruhan namu lapay na in mga kataimanghuran mg sud mari pa room ini, Mgsukul pa Allahu Ta'ala mahuli kanyu.

In pangasubu ko amuin hal sin pag patanog sin pagduwa'a, bya nahilu hala tuud labi na daindi ha kamu ha tungud yan, pasawaha nyu kamu mga kaguruhan namu.

Jawab:

Tadjuk Lawihan

In pagduwa'a bal jama'ah puas sin Sambahayang parduh wayruun nasabbut haka hadis hadisan sin Rasul (sallallahu alayhi wasallam) amuin kiyabaytah sin manga magririwayat, damikkiyan walah ini nahinang sin manga Sahabat niya labi awla in manga... upat Imam (Abu Hanifa, Malik, Shafi'iy, Ahmad ibn Hanbal), malaingkan in papanaw sin manga Fuqaha' Shafi'iyyah jiyari nila magduwa'a bal Jama'ah puas sin Sambahayang parduh ha sakadar paghinduh ha manga sila bahgu pa nag ibadat, sah bang in Jama'ah niya maingat na magsambahayang nah dih na mapatut hinangun sin Imam in nasabbut yan…
Piyagdalil nila in Hadith ha sahihul Bukhari ha baytah hi Ibn Abbs (radiyallahu anhu) pagka dungugan niya in takbir apabila maubus na magsambahayang in Rasul sallallahu alayhi wasallam iban sin manga Sahabat niya. in kaawnan hi Ibn Abbs (r.a.) ha masa yattu batah-batah pa siya magpanayam nayam ha guwah sin Masjid..
Nah, biyahna sin agi in pagduwaa bal jama'ah puas sin Sambahayang parduh walah nahinang sin Rasul sallallahu alayhi wasallam iban sin manga sahabat niya iban walah da isab nahinang sin manga upat Madzhab malaingkan amura in Madzhab Shafi'iyyah sah in pangjarihi nila tuput da panghinduh ha manga bahgu nag ibadat ha pag ubus yattu subay tinggalan na sin Imam…
Awn kaibanan ulama' ha masa bihayaun jiyari nila in pagduwaa bal jama'ah puas Sambahayang parduh, dain ha manga dalil nila amuna in Hadith baytah dain kan Hakim ha ma'ana niya " Apabila magtipun tipun in tumpukan ubus dumuwaa in hambuuk dain kanila sakali mag AMEEN in kaibanan nah taymaun sin Allahu Ta'ala in duwa nila"

In sambag ha papanaw ini, in Hadith piyagdalil nila manunjuki pa dalil Aam (saplag, kaluagan) sabab walah tiyugilah sin Hadith ini bang unu pakaradjaan in piyag jama'ahan nila, adapun tungud sin pagduwa'a bal jama'ah puas sin Sambahayang parduh subay tuud awn dalil Khas (tantu kaniya) ampa wayruun isab dalil kiyabaytah in kakahinang ini tantu nahinang sin Rasul sallallahu alayhi wasallam iban sin manga sahabat niya iban walah da isab biyaytah sin upat Imam..
Bang kami in asubuhun mu in kiyawah namuh papanaw amuna in papanaw sin manga dih magduruwa'a bal Jama'ah puas sin Sambahayang parduh sabab amuini in makusug in dalil niya iban Sahi..

Ampa in pagduwa'a sin kamaasan natuh biyah sin haka gimbahan, magpaasu kamanyan, mag nasib, in ini sulang na ha kakahinang sin Rasul sallallahu alayhi wasallam, muramurahan ampunun sila sin Allahu Ta'ala ha manga hinang walah nila kiyahatihan sin simulang na ha panghinduh sabunnal..
wallahu a'lam