Drifter Rose
Assalamu alaykum wa rahmatullah. Pa mga kaguruhan namu, aun kami pangasubu.
Unu makajari baha magpacolor sin buhuk in mga kababaihan?. Pasalan bang magpa-rebond sin buhuk in ubat hipagbutang masuhul taga color. Kamawmuhan color brown.
Unu makajari da baha' yadtu mara magsambahayang? Mabaya kami humati pasalan laung sin kaibanan di kunu' makajari, pasal di' na ka-aylan in buhuk. Hati niya yadtu kiyatampanan sin color.
InshaAllah karihilan niyu kami jajawaban. Magsukul. wassalam.
Jawab:
Tadjuk Lawihan
Assalamu alaykum Indah Drifter Rose.
In pagcolor sin buhuk jiyari sin Agama Islam sarta' nagkahinang sin manga sahabat (radiyallahu anhum). Laung sin manga Ulama' bang in hangkatau mataud na in puti' sin buhuk niya makajari niya pintahu sin hinnah (passal) walnah pula, kulit , etc,, sagawah dih manjari pintahun sin walnah itum (color itum).
Laung sin kaibanan Ulama' haram in hukuman niya. Laung sin kaibanan Makru' sadja. Na puas sin color yan jiyari sin Agama Islam labi awla bang in babai taga bana sakali hipagpalingklat niya ha bana niya. Na in yadtu labi marayaw hasupaya kuyagan kaniya in bana niya.
Adapun bang in hangkatau magcolor sin buhuk hasupaya siya aturun bata' ba'gu atawa hipanglingu niya hakausugan atawa in usug hipanglingu niya haka babaihan hasupaya siya aturun mabata' pa, sartah itum in pakayun niya color, na in ini piyanglangan sin Agama Islam.
In pagpakayun sin nakauna amuna in HINNAH, passal bang ha bahasa ta. Adapun in pag usalun sin manga parlor bihaun bukun na hinnah ha sabab ini subay kamu mahallih sabab sin awn side effect niya iban in yan taga chemical.
Ampa in color di' da siya hika ta'ga sin tubig suminup pa buhuk hatiniya mabasa' da sin tubig in buhuk.
wallahu a'alam...
RiDah Mutahabba
Assalamu alykum mga kakasi...
Matarrang na in jajawaban sin guru ta byah kan tuan tadjuk..
Manjari ha usug babai in magdye sin buhuk nia puas sdja sin itum. In pagdye sin buhuk itum bang ha mga ulamaus salaf in siya haram. Sabab sin nanglangi ha bihan hantang niya in rasul.
Sa' in higanap ku sadja amun biya' wa y nasabbut sin guru ta.
In magpacolor sin buhuk, jarihun sadja siya sin shara' apabila in siya iyuban na. Bima'na miyuti' na in buhuk niya.
Adapun apabila in walna' sin buhuk niya masi da itum, bimahna way da napinda dain ha kariyasali niya, in iyan HARAM in hukuman niya pintahun mu siya pa dugaing warna', sabab in yadtu laung hi doktor Fauzan nakasud na siya ha tashabbuh (paningud-singud) ha mga tau jahil. Ampa in hukuman sin maningud-singuri ha sila mga jahil in siya matan haram.
In hukuman ini kabakan ha kitab tanbeehat al-ahkam takhtassu bilmu'minaat, biyaktul hi dr. Fawzan..
Kasi iban lasa mawn kaniyu katan..
