Fahad Haris
Aturan sin pagjamban
In agama Islam agama jukup, wayruun daing ha manga karayaw sin pagdunya iban sin pag-agama malaingkan biyatayta' katu' taniyu katan sin ALLAH iban Rasul niya. In katan sin kabuhi' ta aun aturan niya hinang katu' taniyu sin ALLAH. na! in Muslim bang siya mangjamban aun aturan niya ha di' pa siya makasud pa laum sin pagjambanan siyunnat kaniya mamassa sin
"بسم الله , أعوذ بالله من الخبث والخبائث "
" bismillah allahumma inniy audhubika minal khubthiy wal khaba ith".
Hatiniya :
"Tagnaan ku daing ha ngan sin ALLAH, magpatilubun aku daing ha panasat sin shaytan usug iban shaytan babai ".
- Bang sawpama in kaunan niya ha gimba atawa kan ha desert subay siya lumayu' daing ha mga tau amuin di' siya kakitaan iban maun siya patampat amuin katampanan siya .
- Bang in kaunan niya ha kapantayan hiyaram kaniya in umalup pa kiblat atawa kan taykuran niya in kiblat ha sa'bu siya duun ha pagjambanan. Hatiniya subay siya di' umalup pa kiblat iban subay niya di' taykuran in kiblat.
- Adapun bang in kaunan niya halaum (toilet)pagjambanan duwa in papanaw sin mga kaulamaan duun :
- Manjari siya umalup pa kiblat atawa kan taykuran niya in kiblat sabab yaun da siya halaum toilet.
- Di' siya manjari umalup pa kiblat atawa kan taykuran niya in kiblat minsan pa in kaunan niya halaum toilet.
- Damikkiyan niya subay niya aniban in pigsik sin ihi' niya sabab adakala kapigsikan in baran iban sin badju' niya .
- Damikkiyan niya hiyaram kaniya amuin kumpitan niya sin lima niya tuu in awarat niya ha sa'bu siya nangjajamban.
- Damikkiyan niya di' siya manjari mangjaban ha dan paglalabayan sin manga tau iban di' manjari kaniya amuin mangjamban siya atawa kan mangihi' ha tampat paghahali-halihan sin manga tau, iban di' siya manjari mangjamban ha puun kahuy sin tau labi awla na tuud bang in kaunan sin kahuy aun bunga niya .
- Damikkiyan niya di' siya manjari mangjamban ha tubig di' mag-anud biya' na sin tubig kuppung iban tubig kali' .
- Damikkiyan niya di' siya manjari magbissara ha sa'bu nangjajamban.
- Subay niya di' dahun in Qur'an atawa kan manga sulat daing ha Qur'an pa tampat pag-jajambanan.
Maubus mayan sin mangjamban in hipamau'pu' niya tubig, bang sawpama niya wayruun tubig in usalun niya batu, bang sawpama niya wayruun batu jiyari da in manga dahun-dahun atawa kan katas atawa kan tisyu atawa kan kahuy ha sarat igun niya in najis daing ha tampat sin awrat niya. Iban di' niya manjari usalun hipagpau'pu' in bukug sin sapi atawa kan bukug sin kambing atawa kan bukug sin unta' dana in manga tai sin manga binatang nasabbut yan sabab piyanglangan sin Nabi (salawat iban salam kaniya) sin ALLAH.
Patumtum :
In pag-istinja' amuna in pagjamban, daing di ha ini in pangannal sin kamatauran subay tuud siya mahinang ha di' pakaw maka ayil. In ini bang sawpama niya wayruun daisab kaw jiyamban di' na siya magkaligahan in subay pa mag-istinja' sabab in hati sin pag-istinja' pag-sutsi ha pag-ubus mangjamban.
Ya kaw taymanghud ku muslim subay mu tuud aniban in pigsik sin ihi' sabab in kamaturan manusiya' siksa' sila halaum sin pakubulan nila sabab di' nila aniban in pigsik sin ihi' nila. Iban in muslim subay niya tuud sutsihun in baran niya daing ha mga najis. Sabab in ALLAH siyanglit niya in manga manusiya' amuin nagsutsi sin pag-ibadat nila daing ha shirik iban nagsutsi sin baran nila daing ha najis ha Farman niya :
.قال الله تعالى : وَاللَّهُ يُحِبُّ الْمُطَّهِّرِينَ
Hatiniya: Iban sabunnal tuud in ALLAH malasa siya ha manga manuisya' nagsusutsi.
Bang mayan palihalaun natu' in kasutsihan sin pag-ibadat natu'. Iban bang mayan tawfiqan in katan muslim humati sin pag-agama nila iban sara' sin ALLAH.
