Athier Alfad
Salam manga taymanghud ha agama islam...Aun ini pangasubu sin kami maniyu'-tiyu', manjari baha' magkawin atawa magtiyaun ha wala' nag-aalup in babai iban sin usug sumagawa aun na ijin atawa tugut (consent) daing ha maas sibu'-sibu'? magsukul..
Jawab:
Tadjuk Lawihan
Wa alaykumus salam...in pagkawin kabiyaksahan sin kita amuna in bassahan usikum sin kaimaman, ampa in ha sharah sin agama amuna in ijaab iban qabul (kabtangan panukbali sin hambuuk pihak ubus panaymai sin hambuuk pihak).
Upama niya:
Laung sin maas sin babai, papagbanahun kuna kaymu in anak ku hi Fatimah, ubus in qabul amuna in sambag sin usug taymaun ku. Ha hantang ini mahalal na magtuy in duwa pangantin. In agama Islam jiyari katu' hipagtawkil ( hipamugsu' ) pa dugaing tau in ijaab iban qabul, biya' sin hakalayuan in usug, manjari aun usug dugaing tumabuk sin qabul, sa' subay in hantang niya bukun niya taymaun pa baran niya sabab siya kaagi in makaasawa ha babai, subay in sambag niya iban sin bissara sin maas sin babai bihaini,
"PAPAGBANAHUN KU NA IN ANAK KU HI FATIMAH HA USUG NAGWAKIL KAYMU",
Ubus in sambag sin usug kiyapag wakilan,
TAYMAUN KU SUKU' SIN NAGWAKIL KAKU'.
Na! subay kita mahalli' ha parkala' ini sabab bang in bissara sin maas sin babai laung niya; papagbanahun kuna kaymu in anak ku ubus in sambag isab sin usug piyagwakilan TAYMAUN KU tantu bukun na amuin nagwakil kaniya in makaasawa sa' siyana, sabab siya in piyanukbalan iban siya in timayma' Atawa isab hipagwakil sin maas sin babai in ijab pa dugaing tau, ubus in kabtangan sin kiyapagwakilan sin ijab bihaini, PAPAGBANAHUN KUNA KAYMU HI FATIMAH AMUIN PIYAGWAKIL KAKU', ubus in sambag sin usug taymaun ku...
Ha tungud sin pangasubu mu, na! bukun da sharat sin pagkawin subay amuin naghahambuuk hula' in usug iban babai, jiyari sin sharah misan sila naglalayu' ha bang mayan awn ijab iban qabul biya' sin nasabbut..wallahu a'alam..
