Tungud ha Sambahayang Qasar iban Jamah

Pangasubu:
Bers Mahing

     Assalamu alaykum wa rakhmatullahi wa barakatu..Yari aun tiyu'-tiyu' pangasubu ku kahalan sin sambahayang. Insha'Allaah mapasawa niyu kaku. Bang sawpama wayruun imamu in manga sual ku ini, na, kamu na kailu in maingat magpa'amu. 

1. Biyadiin in sambahayang Qasar? ku'nu siya maharus hinangun?
2. Biyadiin in sambahayang Jamah? ku'nu siya maharus hinangun? 
3. Biyadiin in sambahayang Qada? ku'nu siya maharus hinangun?

   Magsukul manga kaguruhan kalasahan. Salam kasilasa kaniyu katan lapay na in tarbilang(members) sin tumpukan (group) ini.

Jawab:
Ibn Shaakir
Wa alaykumussalam warahmatullahi wa barakatuhu tuan Bers.

1 & 2.) In hati sin QASAR bang ha bahasa: " Pagpahawpu' ", bang siya ha sara': " Hawpuun in sambahayang Fardu' upat (4) raka'at (Juhur, Asr iban Eisha) pa duwa(2) rakaat dakuman ha waktu niya ". In Maghrib iban Subuh, di' siya manjari Qasarun (hawpuun).

In hati sin Jamah: 

Papaghambuukun mu in duwa waktu Sambahayang, duun ha hambuuk waktu. Unu in daleel sin pag Qasar?

 Parman sin Allahu Ta'aala:

قال الله تعالى : ( وإذا ضربتم في الأرض فليس عليكم حناح أن تقصروا من الصلاة ) انساء : 101

Parman sin Allahu Ta'ala: 

"Apabila kamu ha tulakan, wayruun salla' niya duun kaniyu in pagQasar daing ha manga sambahayang (fardu' Juhur, Asr iban Eisha)" (Suwrah An-nisaa', ayat 101). 

Hadith sin Rasulullahi (sallallahu alayhi wasallam):

والدليل فعل النبي صلّى الله عليه وسلّم: «فإن النبي صلّى الله عليه وسلّم كان إذا سافر صلّى ركعتين ) أخرجه البخاري، أبواب تقصير الصلاة، باب من لم يتطوع في السفر (1102)؛ ومسلم، كتاب صلاة المسافرين، باب صلاة المسافرين وقصرها (689) (8).

Hati niya: 

"Bunnal tuud in Nabi(Sallallahu alayhi wasallam), in ka-awnan niya, bang siya ha tulakan, magQasar siya"

Kuhnu in pag QASAR maharus hinangun?

     Apabiyla kaw ha tulakan (Musafir) na atawa nakaguwa' na daing ha hula' niya, sakurang-kurang in layu' sin tiyulak niya 83 kms. pa taas, ha hal yan jiyari na kaymu magQasar.

     Apabiyla miyabut na in waktu Juhur, jiyari kaymu sumambahayang duwa (2) rakaat dakuman. Damikkiyan in Asr iban Eisha, bihadtu ra in hantangan niya.

 

Kuhnu in pagJAMAH maharus hinangun?

     Damikkiyan jarihun in pagjama' sin duwa(2) waktu Sambahayang, ha tau Musafir (Magtutulak-tulak). Atawa, bang aun kamumulahan dakula' ha dan, biya' na sin ulan makusug sarta' hikamudarat pa mga sila magsasambahayang ha sa'bu sila halaum Masjid atawa ha Bay (biyah na sin baha', tsunami etc.), ha kahalan ini, jiyari katu' magjamah sin Sambahayang, misan pa kita niyu Muqeem (tutug ha hula').

قال شيخ الإسلام بن تيمية رحمه الله : ( يجوز الجمع للريح الشديدة الباردة في الليلة الظلماء ) ملخص الفقهية الفوزان : 163

Laung hi Shaykhul Islam ibnu Taymiyyah (rahimahullah) :

"Jiyari in magjamah sin sambahayang duun ha Masjid, bang aun hangin makusug sarta' mahaggut ha dum tigidlum bitu-bituhan".

In hantang sin pagjama', bang miyabut na in waktu Juhur, manjari mu na sambahayangun in waktu Asar, sumambahayang naa kaw Juhur duwa (2) raka'at, pagsalam mu, hitindug mu na isab in Asar duwa (2) raka'at sarta' kamatan siya. In pagtawag kaniya Jamah Taqdeem.

In Jamah Tahkheer isab, opposite sin damikkiyan yan. Hati niya, sambahayangun mu in Juhur ha waktu sin Asar, sumagawa' pa-unahun mu naa in Juhur, ampa Asar. In Maghrib iban Eisha, bihadtu da in hantangan sin pagjama' kaniya, sah in Maghrib masi ra tu (3) rakaat dih manjari qasarun (hawpuun), iban sin Subuh masi ra duwa rakaat.

3.) Manjari kaw magqada' (mag ganti') sin Sambahayang fardu' ha way mu piyagtu-uran, biya' na sin:

• a.) Nakatug : Amuin tug, misan mu hinang na in katan sabab hipagpupukaw kaymu, masi way mu kiyasayuhan sambil gimuwa' in mata Suga. Ha hal ini, jiyari kaymu magqada' sin Subuh pagbati' mu misan gigimuwa' na in Suga ha wayruun dusa bistahun kaymu. Sabab di' hipatanggung sin Allahu Ta'aala in unu-unu parkala' ha wala' ta piyagtuuran.
• b.) Nalawa' in akkal (nalawa' ha panayu): Pagtumtum niya, kiyalipasan na tuwi' siya waktu.

     Bang sawpama tinggalan in Sambahayang ha piyagtu-uran, karna' sin lisu' niya, na, ha hal ini, ikhtilaf in mga Ulamaa'. 

• Laung sin kaibanan subay ra siya sumambahayang, kalu-kalu siya ampunun sin Allahu Ta'aala. 
• Laung sin kaibanan, di' na siya sumambahayang karna' misan siya sumambahayang di' ra yadtu hikatapal sin dusa niya, sa' pata-urun niya na sadja in sunnat niya, karna' in sambahayang sunnat hikatapal sin sambahayang fardu' kiyatinggalan niya.

     Hasupaya siya makatangkis ha Khilaf, subay siya sumambahayang, baya' baya' na sin Allahu Ta'ala kaniya, sarta' pagtaubatan niya in pagpahil-pahil niya ha Sambahayang, di' niya na pag-isaban balik, kalu mura-murahan ampunun siya sin Allahu Ta'ala.

Wallahu a'lam bissawab.