Abushaira Saidina
Assalamu alaykum wa rakhmatullahi wa barakatuhu saplag pa katan tatbilang ha tumpukan ini. In pangasubu namu' biyadiin kaingat ta in ammal ibadat ta natayma' iban sin wayruun? unu in manga tanda'(sign)?
Jawab:
Ibn Shaakir
Wa alaykumussalam wa rahmatullahi wa barakatuhu tuan Abushaira Saidina. In maka-ingat bang natayma' in Ibadat natu' tuput tunggal in Allahu Ta'aala, sabab siya in magtatayma' sin katan Ibadat manahut maaslag. Sumagawa', aun alamat (pangindanan) bang in Ibadat yan tiyayma' sin Allahu Ta'ala, biya' na sin mga ini:
- 1.) In katan Ibadaat hinangun ta, subay aun dalil(suntu-an) daing ha Qur'an iban ha Sunnah sin Rasulullahi (sallallahu alayhi wasallam). Sabab, apabila in hinang mu wayruun dalil(suntu-an) ha duwa(2) yan, di' taymaun sin Allahu ta'aala.
Sabda sin Rasulullahi (sallallahu alayhi wasallam):
"Hisiyu-siyu in naghinang, sin unu-unu na hinang (ha Agama/ ibadat) wayruun namu' piyangda-akan, na!,(in hinang yan) di' taymaun (sin Allahu ta'aala)" (Kiyariwayat hi Bukhariy iban Muslim).
Laung sin manga Ulamaah, in Ibadat Tawqifiyyah atawa in asal (kari-asali) sin hukuman sin Ibadat Haram. Malaingkan bang aun dalil(suntu-an) dayin ha Qur-an iban Sunnah sin Rasulullahi (sallallahu alayhi wasallam).
- 2.) Subay in Ibadat yan IKHLAS (mag-agad in kug iban baya' karna' sin Allah tuput tunggal isa-isa niya, salamat ha kashirikan iban pakita'-kita'), iban imatap in hinang Ibadat yan ha SUNNAH sin Rasulullahi (sallallahu alayhi wasallam).
Amuna ini in putti sin Shahaadatayn (duwa shahadah), in pagnayik saksi' ha لا اله الا الله محمّد رسول الله, janji' mu pa Allahu ta'aala sin Ikhlas in pag-ibadat mu kaniya, in pagsaksi' mu pa Nabi Muhammad (sallallahu alayhi wasallam), amuna in magad kaw ha Sunnah niya.
Apabila bukun hadil in duwa(2) ini, in Ibadat di' taymaun sin Allahu ta'aala, mataud dalil(suntu-an) ha Qur'an kareem iban Sunnah sin Rasulullahi (sallallahu alayhi wasallam), lamud na in hadith nasabbut natu' ha taas.
- 3.) Dayin ha mga alamat (sign) tiyayma' sin Allahu ta'aala in Ibadaat, bang in ka-awnan sin hambuuk manusiya' masi-masi halaum pagtaat pa Allahu ta'aala, ha farman niya ha Suwra Al-baqarah, ayat 183
:قال تعالى: ( يَا أَيُّهَا الَّذِينَ آمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ ) سورة البقرة, آبة 183
Farman sin Allahu Ta'aala:"O kamu namamaratsaya (Bar-eiman) nafardu' na kaniyu in pag-puasa, biya' sin kafardu' (wajib) ha mga sila naka-una daying kaniyu, mura-murahan (ha sabab sin pag-puasa niyu) magmabuga' kamu pa Allah" (Al-baqarah, ayat 183).
Alhamdulllah, magdaratung-datung na isab in Bulan Mulliya katu' niyu tamba-manamba in barakat iban pahalah sin Ibadat halaum niya, Ya Allah, pa-abuta kami pa bulan Ramadhan. ameen ya Rabb.
In bunga sin pag-puasa, amuna in Taqwa(pagmamuga'), hati niya, alamat sin tiyayma' in Ibadat sin Manusiya', amuin masi-masi siya himihinang sin diya-akan sin Allahu ta'aala iban imaanib ha mga liyangan niya.
Parman pa sin Allahu Ta'aala ha Suwrah Al-'ankabuwt ayat 45:
قال تعالى: (..... إِنَّ الصَّلَاةَ تَنْهَى عَنِ الْفَحْشَاءِ وَالْمُنْكَرِ ...) سورة العنكبوت, آية 45Parman sin Allahu ta'aala:
"Bunnal tuud in Sambahayang makapa'gang ha hinang salummi'-lummi' (Zina) iban hinang mangi' " (Suwrah Al-'ankabuwt, ayat 45)
Dalil da isab sin tiyayma' in Ibadat Sambahayang, apabila kiya-aniban ta in manga piyanglangan (hiyaram sin Allahu Ta'aala).
Wallahu a'lam bissawab.
