Kareema Muctar
Assalamu alaykum wa rahmatullahi wa barakatuhu.. Awun ini sual namu'. Tiyugut (recommended) sin shariah (that to be good to our neighbors) amuin subay kita maraw magpangdaig misan pa siya bukun muslim? Mabaya' aku maghadiya pagkaun ha pangdaig (neighbor) ku christian sa' in kiyahawpu' sin baya' natali' ku bang niya isab aku dihilan in balik('return) subay ku tabukun. Magduwa-ruwa aku kumaun sin hinangan sin biya' kanila kalu laung ku in piyaglutuan nila bakas piyaglutuan sin pagkaun amun hiyaram katu'. Mangayu tuud kami patumtum (please comment). Jazakumullahi khayral jazah..
Jawab:
Najs Sarail Tahir
Wa Alaykum mussalam wa rahmatullaahi wa barakaatuhu.Ha magmarayaw pa pangdaig bay in ini piyangdaakan sin sara' sibu' da dugaing agama in pangdaig / labi luba' bang Muslim. In pag marayaw kanila mataud in ginisan niya, biya na sin;
- Tumibaw(visit) kanila bang masakit,
- Pagparayaw sin pangaddatan kanila,
- Dayaw sin aymuka kanila,
- Pagtabang kanila bang sila kasigpitan magkalagihan tabang, Labi pagda'wa pagpatumtum kanila,
- Pagdihil atawa paghadiya pagkaun kanila atawa unu unu na..
In ini daing ha manga ginisan sin pagmarayaw kanila. Adapun ha kahalan biya' sin nasabbut mu yadtu hati niya mabuga' kaw dìhilan nila sin pagkaun nila, in hinangun mu subay mu hibaita' iban pasawahun kanila ha agama namuh Islam piyangdaakan kamu sin agama namu' in subay magparayaw ha pangdaing bay, magdihil-dihili pagkaun upama iban na sin kaibanan haq sin pangdaig sibu' da pagkahi namuh sibu' agama iban sin bukun. Ampa mu pasawahun kaniya, ha biya' kamu Muslim strict kami hapagkaun amuin subay tuud halal matantu namu' in pagkaun, sabab amuyan in piyangdaakan sin agama Islam.
Adapun bang kaw dìhilan nila balik niya(return) kaagi ayaw muna tabuka, dumihil na sadja kaw kanila, dì' dasan isab ngumi' in pangatayan nila kaimu.
