Pangadji'an :
Fahad Haris
Piyag-biddaan sin istihada haid ( biyulan ) iban sin istihda ( duguh sakit )
In haid : duguh mag-guwah daing ha pakandangan sin manga kababaihan sakahabah bulan biyah na sin pag-kabiyaksahan sin manga kababaihan apabila damatungin waktu niya .
In tiyap-tiyap babai nag-bibidda-biddai in taud sin yadlawan sin pag-duguh nila , daing ha sabab yattu daing ha manga mahunit halulayun hukuman amuna in haid sabab in tiyap-tiyap babai dih mag-sibuh-sibuh in pangaddatan sin haid nila malaingkan kitaun in pag-bulan niya duun ha taud sin adlaw pag-kabiyaksahan niya bang sawpama in kabiyaksahan ha tiyap-tiyap bulan halaum sin hangkapitu duguun siya pag-puas sin hangkapitu tumahay siya duun ha kahalan yan duun kitaun ha kabiyaksahan niya bang sawpama niya aun pa gumuwah duguh mapuas siya namayguh pag-ubus aun gimuwah duguh in yan mabilang siya duguh istihada sumagawah in makaingat dayan sin kahalan sin pag-duguh yan sila manga kababaihan hangkan subay sila dih masipug mangaru ha palihalan sin hukaman yan sabab lamud siya daing ha manga sarah piyawajib sin tuhan .
Manga ammal ibadat dih maharus ( hiyaram ) sin sarah hinangun sin babai ha sahbu siya biyubulan .
1. Hiyaram kaniya in sumambahayang sibuh da sambahayang parduh atawa kan sunnat .
2. Hiyaram kaniya mag-puasa sibuh puasa wajib iban sunnat .
3. Hiyaram kaniya in mag-tawap ( mag-kuliling ) duun ha kahba iban mag-sai ha safa iban marwah .
4. Hiyaram ha bana niya suukun ( jimaun ) siya .
5. Dih siya manjari humanti duun halaum sin masjid .
6. Dih siya manjari kumumpit sin qur’an ha wayruun lampik sin lima niya malaingkan in mag-bassa siya qur’an ha dih niya na kumpitan in qur’an sartah in kabugaan niya apabila niya dih balikun in nahapal niya in papanaw makusug jiyari sin sarah mag-bassa siya sin qur’an .
7. Manjari ha bana panguyag-kuyagan niya ib baran sin asawa niya minsan pa biyubulan ha sarat bukun ha awrat
In istihada : amuna in duguh mag-guwah daing ha pakandangan sin babai sumagawah in siya yan duguh sakit .
Pagka nakawa tana in hati sin duguh ( biyulan ) mapinig muna in yak aw babai in duguh haid iban istihada biyah na sin kiyabaytah ta bang sawpama niya in kabiyaksahan in lugay sin pag-bulan sin babai hangka pitu in katan gum uwah duguh mapuas sin hangka pitu yan mabilang na siya istihada malaingkan in makapinig sin duguh haid iban istihada tuput sila manga kababaihan hangkan subay hiyanglah mag-balik kanila .
In piyag-biddaan sin duguh istihada iban haid in ha duguh haid nakawah tana bang unu namayan in manga ammal ibadat dih manjari hinangun sin babai biyulan adapun in duguh istihada yari in manga hukuman manunjuki kaniya .
1. Wajib kaniya sumambahayang lima waktu in atulan niya mag-ayil siya apabila sumud na in waktu sin tiyap-tiyap sambahayang sartah bang siya naubus na nag-ayil butangan niya in awrat niya sin hikapahgang sin pag-guwa ha duguh niya masa da in sambahayang niya minsan pa aun mag-guwa duguh daing ha awrat niya .
2. Wajib kaniya mag-puasa ha bulan minsan pa aun gimuguwah istihada daing ha awrat niya .
3. Jiyari kaniya kumumpit iban umulin sin qur’an iban mag-bassa kaniya sibuh da aun lampik iban sin wayruun lampik .
4. Ha papanaw bunnal iban makusug jiyari ha bana jimaun in asawa niya minsan pa in babai halaum istihada .
Mura-muraha nakakawah kamu hukuman iban kapaiddahan duun halaum niya sartah papag-mumpaataun katuh taniyu sin allah in manga pangadjian halaum niya
