Bismillaahi walhamdulillaah was salaatu was salaamu ‘alaa rasuwlillaah
HUMALLI' KITA NIYU DAYNG HA PAGSIB HA KA'YBAN/KASIPUGAN SIN TAYMANGHUD NATU' MUSLIM.
Sabda sin rasuwlullaah sallallaahu ‘alayhi wa sallam:
يا معشر من آمن بلسانه ولم يدخل الإيمان قلبه لا تغتابوا المسلمين ولا تتبعوا عوراتهم فإنه من اتبع عوراتهم تتبع الله عورته ومن تتبع الله عورته يفضحه في بيته
Yaa kamu mga tumpukan sin hisiyu-siyu na amu’in nag-eeman ha dila’ niya sadja sarta’ way pa simud in pag-iymaan pa laum atay niya “Ayaw kamu manglimut ha mga muslimeen iban ayaw kamu mag-urul (mangjaga-jaga) ha awrat (ka’ayban) nila, bunnal tu’ud hisiyu-siyu in imu’urul/nangjaga-jaga ha awrat (ka’ayban) nila (mga muslimeen) jagahan daysab sin Allaah in awrat/ka’ayban niya, hisiyu-siyu in jiyajagahan sin Allaah in awrat niya naa’ bi’asun/sipugun siya sin Allaah misan ha laum bay niya (atawa sampay pa laum bay niya)
[Sunan Abiy Daawud, bayta’ dayng kan Abiy Barza radiallaahu ‘anhu, miyattan hi Imaam Al-Albaaniy rahimahullaah]
In pangadji’an makawa’ ha hadeeth ini:
1. Alamat sin munaafiq in magpanglimut ha hisiyu-siyu na muslim, amura in way lamud ha paglimut ini bang in ta’u yan tanyag magmama’siyat ha laum qawman, dayng ha mga magbibid’ah ha aagama atawa nagsumbung pa qaadi magpahukum ha kangiy’an sin hambu’uk ta’u, sabab di’ mabilang paglimut in pagpalihala’ sin kasabunnalan iban kasalamatan sin qawman dayng naman ha ‘aqeeda/pag-aagama sampay paghula’-hula’ sin maanusiya’ ha qawman.
2. Hisiyu-siyu in mangjaga-jaga ha ka’ayban/kasipugan sin taymanghud niya muslim sarta’ hipasaplag niya ha ka’ibanan naa’ sipugun daysab siya sin Allaahu Ta’aalaa misan pa siya timatapuk ha laum bay niya atawa sampay pa laum bay niya sipugun siya sin Allaah ha mga ahli/kaluarga niya.
Labi-luba’ na ha jaman ini in pagchismis/paglimut masapat pa dayng ha report sin cnn/bbc/Aljazeera, yan na in cellphone, fb iban na ka’inanan latest technology, naa’ humalli’ in mga sila maanusiya’ wayru’un na hinang nila duga’ing malaingkan mangjaga-jaga ha ka’ayban sin taymanghud nila muslimeen, ingata niyu in Allaahu Ta’aalaa gapi’ sin hisiyu-siyu na bar-eeman, in mamuhinga’ kanila tantu bausun sin Allaahu Ta’aalaa.
Bang man piyapagmunfa’at sin Allaah in patumtum ini iban bang man palihala’un sin Allaah in dila’ natu’ dayng ha paglimut iban na kataan kangiy’an sin dila’, ameeen.
Wallaahu a'lam bissawaab.
