Ben-ajar Tingkasan
salam manga taymanghud ko agama islam..
Aun ini sual ku. Unu in pagbahasahun tawheed? Iban biyadiin kahantang niya? Iban in tawheed pagnganan magkabugtu' siya atawa di'?
Mabahaya' aku humati ha hal in. Magsukol manga kaguruhan sin kami...
Jawab:
Tadjuk Lawihan
in kalima TAWHEED siya in puunan (masdar) sin fi’il ( وحّد ، يوحّد ) hatiniya: hiyambuuk/ tiyunggal/ tibuuk in hambuuk unu-unu.
Di’ maparagbus iban masampurna’ in panawhed sin hangkatau malaingkan subay niya mara in duwa sharat ini:
1.) Napi: siyana in payluhan in sabarang Tuhan di’ mapatut sumbahun.
2.) Isbat: siyana in tantuhun in katunggal sin Allahu Ta’ala.
Ha hal ini, bang upama napi (paylu) sadja in papanawn sin manusiya’ tartantu laung sin maas-maas mahulug na siya pa la yahullu, mayta’?? sabab piyayluhan niya in sabarang susumbahun. Bang isab Isbat sadja, tantu way ra isab kimugdan, maytah?? sabab way niya piyayluhan in di’ mapatut sumbahun, hatiniya: bukun tikmud ha angan-angan niya in katunggal sin Allah Mahasutsi Mahatinggi.
Upama niya: laung mu ” Ma Qama Zaidun” way timindug hi Zaid, in ikaw ha angan-angan mu piyayluhan mu sabunnal tuud in kaawnan hi Zaid way nagtitindug. Bang isab laung mu: ” Qa ma Zaidun” nakatindug hi Zaid, na’ in ikaw nag-isbat (nagpatantu) sadja sin in hal hi Zaid nagtitindug, sagawa’ way mu niyapihan sin awn pa dugaing nagtitindug daing kan Zaid.
Bang laung mu: LA ILAHA (way Tuhan) piyayluhan mu sin wayruun tuud Tuhan, na’ nahulug nakaw palaum kapiligruhan. Bang isab laung mu: ILLA ALLAH (malaingkan Allah) tiyantu mu sadja sin Allah in Tuhan sagawa’ way mu piyayluhan sin way na dugaing Tuhan daing kaniya.
Na’ in sharat sin kalimah at-tawheed (La ilaha Illallah) subay mag-agad in napi (paylu) iban Isbat (tantu) hasupaya masampurna’ in pagtuhan duun kaymu.
Hatiniya:
Piyayluhan mu in sabarang tuhan di’ mapatut sumbahun ubus ampa mu tiyunggal in Allah siya in Tuhan mapatut sumbahun.
Banng mabugtu' in panawheed sin hambuuk tau, in siya halaum kapiligruhan sin kasirik.
wallahu a'alam...
