Ibn Shaakir
الحمد لله ربّ العالمين ، والصلاة والسلام على الذي سنّ للبشرية طريق العفة والحصان لتصلح على مدى الزمان أخلاقها ، وعلى آله وأصحابه ممن امتثلوا شرع الله ، فكانوا بحق خير أمة أخرجت للناس ، وعلى من سار سيرهم ، وامتثل طريقتهم بإحسان إلى يوم الدين . . وبعد
السلام عليكم ورحمة الله تعالى وبركاته
The secret and wisdom of lowering the gaze!!!
Laung sin Anatomists : Aun ha ginhawa baran sin manusiya’ 5-million cells, hatiyap tiyap hambuuk cell magda sin pangnanam (feelings) sin manusiya’, Apabila magsa’gid in pais sin usug iban babae magtuy magconnect atawa humibal in shahawat (desire) sin usug iban babae.
Magpalandu’ sin bantug amun makaguwa’ na dain ha sara’.In yadtu pagbantug usug sibu’ sibu’ bang makalandu’ na di’ manjari ha sara’.
Giyanapan nila pa (Anatomists): Sambil sense of smell, in sense sin manusiya’ connected siya pa sexuality, apabila kahamutan sin usug in hamut sin babae atawa vice-versa, magtuy magconnect in shawat (desire) nila.
Damikkiyan in Pangdungug (sense of hearing) connected siya pa shahawat (desire) sin manusiya’, Apabila karungugan sin usug in tingug sin babae, biya’ sapantun kalangan connected siya pa parakala’ shahawat (desire), atawa tingug maluuy, lamma lambut, malambing etc…magtuy humibal in shahawat (desire) sin usug.
In mga nasabbut yan bissara sin mga Anatomists, piyangadjian nila marayaw iban sin systems nila atawa equipments nila.
Subha-nallah!, hisiyu marai’ naghindu’ ha mga Anatomists yadtu?.
Bukun ba ha Parman sin Allahu taala:” Allamal insaa-na maa lam ya’lam”?
“Taught man that which he knew not.”
Al-Qur'an, - 5 (Al-Alaq)
Amuna yadtu in secret iban wisdom ha Parman sin Allahu taala, hangkan di’ kitaniyu daakun umatud pa hiyaram sin Allahu taala.
قال تعالى : ( قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ) سورة النور :30 الآية
“Say to the believing men that they should lower their gaze and guard their modesty: that will make for greater purity for them: And Allah is well acquainted with all that they do”.
(Al-Qur'an, 024.030 (An-Noor)
Laung hi Abul-Aaliyah: katan farj (modesty) nasabbut papaliharaun halaum sin Qur’an, in maksud niya papaliharaun dain ha hinang ma’siyat (zina), Malaingkan ha a-yat ini in maksud niya patabunan in awrat.
Laung hi Ibn Zayd: “ Yaghuddu min absa-rihim ”, apabila siya makakita’ ha bukun hiyalal (haram) kaniya pirungun niya in mata niya, maksud: di’ niya aturun atawa biburun pahansipak in pangatud niya, sabab di’ kagausan sin manusiya’ pirungun in mata niya katan.
Kalu-kalu aun mangasubu pagka’ in babae diyaak sila maghijab hasupaya kaaniban in pitna, na, unu isab in subay tabunan sin usug hasupaya siya di’ makadihil pitna ha kababaehan?
Subay di’ niya hipakita’ ha Kababaehan in tampat amuin hikahibal atawa hikabukal sin nafsu (desire) sin babae.
Sabunnal tuud in Allahu taala piyalihara’ niya in ipun niya nagdaraawa sin pag-eeman (usug babae) hasupaya matambul nila in katan labayan sasat sin shaitaan.
Riwayat dain kan Alih (radiyallahu anhu) laung niya: "Aun hambuuk usug miyanaw ha ran sin Madinah ha zaman sin Rasulullah (sallallahu Alayhi Wasallam), na’, nakaatud siya pa hambuuk babae sambil babae imatud da isab kaniya, sambil hiyahagas hagasan sila sin shaytan sin in pag-atud nila pakaniya pakaniya, atud iyaagaran haylan atawa bayah, Tatkala’ nakalabay in usug yadtu haraig ad, pagkita’ niya ha babae nakarugtul siya, Na’, nasipak in ilung. Laung sin usug ini: Wallahi, di’ ku hugasan in dugu’ ini sahingga makasampay aku pa Rasulullah (sallallahu Alayhi wasallam), Pagdatung niya kissa niya na in jimatu kaniya, Laung sin Rasulullah (sallahu Alayhi Wasallam): “ Amuna yan in tungbas sin dusa mu”. ( Addurrul Manthur, As-suyuti vol.5 pg.40).
Amuna ini in sabab kanaug sin a-yat hataas yan.
Di haini mabaya’ kami kumawa’ pangadjian hukuman maniyu’ tiyu’ hasupaya in kitaniyu ha laum kasawahan, iban hasupaya kitaniyu makalayu’ dain ha fitnah, sabab bang natuh di’ mapalihara’ in parakala’ ini tantu na sadja maharubilu in kabuhi’ ta niyu iban mangdahi katu’ taniyo pahinang ma’siyat pa Allahu taala iban mangdahi katu’ pa hapinarkah jahannam.
1.) Subay pu’puun natu’ in mata taniyu dain ha hiyaram sin Allahu taala.
قال النبي صلى الله علبه وسلّم : ( يا عليّ لا تتبع النظرة النظرة ، فأنّ لك الأولى ، وليست لك الثانية ) رواه الترمذي (2777) , وأبو داود (2149) , وأحمد (ج5 برقم 353
Hatiniya:“ Ya Alih, ayaw mu baliki in pangatud mu, Sabunnal tuud in atud mu panagnaan kaymu (di’ kaw magdusa) in atud mu hikaruwa bukun na kaymu (magdusa na kaw)”.(Tirmizi [2777], Abu-daud [2149], and Ahmad [vol.5 pg.353]).
Mayta’ di’ kitaniyu magdusa ha atud panagnaan?, Sabab in yadtu atud bukun dain ha kabayaan taniyu, iban atud bukun miyaksud, di’ kitaniyu hisabun iban di’ kitaniyu siksaun sin Allahu taala.
In atud hikaruwa atawa pagbalik balikan dain ha kabayaan sin ginhawa baran taniyu, na, bang masi naman kita niyu umatud, di’ natu’ hipalling in pangatud natu’ parugaing sasatun na kitaniyu sin shaytan amuini in sabab hikabukal atawa hikahibal sin nafsu (desire) taniyu, sambil makatali’ kitaniyu pamangih.
Mayta’ kitaniyu liyang sin Allahu taala iban sin Rasul niya Muhammad (sallallahu Alayhi Wasallam)? Sabab in bala’ atawa musiba (affliction) di haini tumagna’, Iban amu ini in lawang hikasampay pa pangatayan, sambil makasampay pahinang zina.
Laung sin hambuuk poet Ahmad Shouki: “ Najratun, Fabtisa-matun, fasala-mun, Fakala-mun, Famaw-idun, Faliqa-un”.
Hatiniya:“In panagnaan mag-atud iyaturi, pag-ubus mag-uyum iyuyumi, pag-ubus magsalam siyalami (shake hands), pag-ubus magminnu minnu, pag-ubus magbaakbaak na”.
Sambil na makasampay pa hinang langgal sara’ magkaput kiyaputi na sambil maka sampay pa zina, magtagna’ sadja dain ha pangatud, Bissara nakaw unu-unu kabayaan mu.
Ha Sabda sin panghu’ natu’ Muhammad (sallallahu Alayhi Wasallam):
قال الصادق المصدوق صلىّ الله عليه وسلم : « النظرة سهم من سهام إبليس مسمومة فمن تركها من خوف الله أثابه جل وعز إيمانا يجد حلاوته في قلبه » « هذا حديث صحيح الإسناد رواه الحاكم في مستدركه
Hatiniya:
“In pangatud (pahiyaram sin Allahu taala) pana’ dain ha pana’ hi iblis tagalassun, hisiyu-siyu timinggal kaniya hakarna’ kabuga’ niya pa Allahu taala tungbasan siya sin Allahu taala pag-eiman kananaman niya in limu’ halaum pangatayan niya”.
Biya'diin in maksud sin lassun hi iblis?. Sawpama mamana’ kaw hayup ha way mu kiyagumsanan (natudju) sa’ kiyapanggisan sadja sin pana’, in pana’ yadtu aun lassun niya, in lassun yadtu suminup pa laum baran sin hayup yadtu iban manaw ha dugu’ niya sambil na sadja siya mapatay, bihadtu in hantang sin manusiya’ bang di’ niya pu’puun in pangatud niya dain ha hiyaram sin Allahu taala, in duwa mata niya yaun butangan sin iblis lassun hasupaya siya makahinang ma’siyat (zina).
In tau hipu’ in pangatayan niya sin pagmabuga’ pa Allahu taala, kaingatan niya amuin di’ niya madawhat in karida-an sin Allahu taalla malaingkan subay tinggalan niya in hawa napsu niya dain ha liyangan sin Allahu taala.
Iban in pagpu’pu’ sin pangatud dain ha hiyaram sin Allahu taala mataud kapaiddahan niya dunya akhirat.
Sabda sin Rasulullah (sallallahu Alayhi Wasallam):
قال رسول صلّى الله عليه وسلّم : ( ما من مسلم ينظر إلى محاسن امرأة ثم يغضّ بصره إلا أحدث الله له عبادة يجد حلاوتها في قلبه ) رواه أحمد والطبراني عن أبي أمامة
Hatiniya:
“Wayruun dain ha muslim apabila makakita’ kaiinginan daing ha babae, ubus hibaba’ niya in pangatud niya buwat malaingkan papanjarihan sin Allahu taala kaniya iba-dat sarta’ kananaman niya in limu’ niya halaum sin pangatayan niya”. (Ahmad, and Attabara-ni dain kan Abi umaama).
2.) Subay paliharaun taniyu in pangdungug iban sin simud taniyu dain ha hiyaram sin Allahu taala.
Hangkan na liyang kitaniyu sin sara’ dumungug sin suwara sin babae, labi awla na bang suwara marayaw dungugun, Labi-labi na tuud kalangan nasabbut didtu in hikabukal atawa hikahibal sin shahawat (desire) sin usug, iban kalangan laka’ laka’ atawa sipatun in baran sin manusiya’, sabab in yadtu mangda-hi pa hinang ma’siyat.
Hangkan na bilang sin MAZHAB HANAFI in suwara sin babae dain ha mga awrat, amuin di’ manjari dungugun sin usug, Laung nila: Liyang sin Allahu taala in babae magtikarag (magpanaw kadungugan in lakud-lakud sin siki nila) hasupaya di’ karungugan in tingug sin gallang nila ha siki (anklet). Bang laung nila liyang in babae magtikarag, subay labi awla piyanglangan in suwara sin babae.
Malaingkan ha MAZHAB SHA-FII iban dugaing pa dain kaniya, In suwara sin babae bukun siya dain ha manga awrat, Sabab in babae makadjari mami iban magdagang, damikkiyan makadjari siya mahinang witness ha alupan sin sara’, sabab magkalagihan subay kusugun in suwara.
Laung sin Sheikh taniyu Muhammad Alih Al- Sabuni: “Subay la-ngun sin kausugan in kababaehan nila dain hakatan hikarihil pitnah iban hikabukal atawa hikabuhi’ napsu (desire) sin kausugan, Amuna ini in hikasaplag sin kangi-an sabab sin pagpasad sin kausugan ha kababaehan nila, magma’na naig na in pagmahi iban pagpalihara’ ha Kababaehan nila. in tau di’ magmahi ha Kababaihan nila, di’ sila matag muslim sabunnal, sabab dayyus sila, tiyawag sila sin Rasulullah (sallahu Alayhi Wasallam) DUUYUTH.
Ha Sabda niya: “ Tuw(3) parakala’ di’ makasud surga’, iban di’ nila kahamutan in hamut sin surga’, hambuuk na dain ha tuu yadtu amuna in DUYUUTH,” Laung sin mga Sahabat: Hisiyu in pagnga-nan mu DUYUUTH ya Rasulallah?, Laung niya: “ Amuna in usug pasaran niya in ahli niya misan pa maghinang kalummian”. (Attabra-ni fis-sageer dain kan Ammar Ibn Ya-sir bisanadin saheeh).
Hahambuuk bayta’ :” In DUYYUT amuna in tau di’ magmahi ha ahli niya.”
Pila sadja dain ha mga kausugan misan kakitaan nila in ahli nila maghinang ma’siyat di’ nila malang humundung sadja sila wayruun mahinang nila. Hasab sin pagpasad nila ha mga kaasawahan atawa kaanakan nila, sumaplag na in kama’siyatan hakaranda-nan. In mga Kababaehan, tabiya’ dakuman biya’ na binatang gamman labi pa dain ha binatang sabab in binatang aun waktu maluman bang kakitaan sin tau, agad agad naangkat na in kasipugan daing ha mga kaanakan natu’ ha zaman ini.
Damikkiyan in pagbantug ha pagkahi manusiya’. Aun hambuuk usug nasabbut ha hadarat sin Rasulullah (Sallallahu Alayhi Wasallam) biyantug niya in iban niya ha karayawan, Laung sin Rasulullah ( Sallallahu alayhi Wasallam): “ Binsanaun mu in iban mu, binsanaun mu in iban mu “ Sambil piyagbalik balikan sin Rasulullah (Sallallahu allal Wasallam) kaniya, pag-ubus laung niya: “ Bang way rapat sin hambuuk daing kaniyo subay tuud makasanglit, mamung ba sadja siya: ha huna’-huna’ ku hikuwan yaun biya’ haini, biya’ haini….bang pagkita’ niya patut siya ha damikkiyan yadtu. Iban jukup na ha Allahu taala makaingat sin kahalan niya, Iban di’ siya magbissara talus hakarayawan sin hambuuk tau”. (Bukhari [2662] and Muslim [3000]).
In pagbantug: Amuna in sabbutun mu in karayawan sin pagkahi mu, in ini jiyari sin sara’, Sabab in Allahu taala biyantug niya in mga kanabihan iban sin kaibanan sa-liheen dain ha i-pun niya, damikkiyan biyantug sin Rasulullah (Sallallahu alayhi Wasallam) sin babantugan tartantu in kaibanan sahabat niya, biya’ na kan Khadeejah, A-ysha, Fatimah, Um Salamah, Abi zar, Abdullah Ibn Mas-uud, Iban sin mga sila hangpu’ mubashshareena bil-jannah, iban pa dugaing dain kanila, In yadtu dain ha Allahu taala iban Rasul niya, bunnal wayruun pagduwaruwa.
Malaingkan laung sin mga Ulama’ papaanibun kita niyu dain ha duwa(2) parakala’:
- Pagbantug di’ niya kaingatan sabunnal tuud in tau biyantug niya yadtu dain ha mga tau marayaw hat kita’ niya in lahil niya.
Bang sawpama wayrapat subay ra siya makabantug, makadjari na siya mamantug biyah sin agi niya: bang kakuh, tau sa-lih (marayaw) siya, tau magsasabunnal, atawa tau kapangandulan walaa uzakki alallahi ahadan , in ini pagbantug ga-ib.
Bang ha-dir in tau biyantug niya, ampa di’ niya kaingatan in pagkatau sin biyantug niya, labi maraw humundung na siya di’ na siya mamantug, in hiyallian hasupaya di’ siya makabantug sin kaputingan, iban hasupaya in tau biyantug niya yaun di’ tumubu’ duun kaniya in pagtakabbul.
Nasabbut ha hadith: Biyantug sin hambuuk usug in hambuuk dain ha mga King, magtuy siyabulakan hi Miqdaad in tau nagbantug yadtu sin lupa’ laung niya: Naraak kami sin Rasulullah (sallallahu Alayhi Wasallam) pasabulakan sin lupa’ in pamayhuan sin mga tau mamantug (ha pagkahi niya). (Muslim: [3002]).
Aun pa isab hambuuk usug biyantug niya in hambuuk usug ha hadarat sin Ibn Omar (radiyallahu anhuma), magtuy niya siyabulakan in usug yadtu sin lupa’ ha simud, laung niya: nagsabda in Rasulullah (sallahu Alayhi Wasallam):” Apabila kakitaan niyu in tau ma-mantug sabulaki niyu in pamayhuan nila sin lupa’. (Laung hi Sheikh Albani: Hadith Saheeh).
Damikkiyan pagbantug sin usug pa babae subay di’ makalandu’, biya’ sapantun laung niya: Babae lingkatan, mairum, mamanis atawa pilihan, in iba-ra (expression) ini di’ manjari. Atawa tawagun in babae using words of endearment biya’ na sin lasa atawa langga’ amuin way kaunu-unu. In hiyallian didtu, hasupaya di’ mahaylan in pangatayan sin babae, kiyaingatan sin makaingat, in pangatayan sin babae maluhay dukutan sin bissara malimu’. Na, bang dukutan na ampa makalamud na in shaytan, in kajatuhan niya bala’ dakula’ na. Damikkiyan in babae bihadtu ra isab subay di’ mamantug pa kausugan sin bantug makalandu’.
Malaingkan bang aun niyat sin usug asawahun niya in babae biyantug niya yaun, ampa gawgut na siya, makajari niya bantugun atawa paandigan sin in siya aun baya’, hasupaya kaingatan sin babae aun baya’ niya, sa’ bang wayruun da di’ manjari magpalandu’.
Sabab in magpalandu’ sin babantugan dain ha mga alamat (tanda’) sin tau muna-fiq (hypocrite), dain ha mga poets iban sin mga maghuhutba’, in kamatauran maghinang sin biya’ haini mga tau aun puhungun nila.
C. Subay di’ maghamut hamut in babae bang sila gumuwa’ dain ha bay nila, Iban di’ magpaguwa’ sin pangari-ngari nila.
Sibu’ da huma-dir (u-mattend) hapagtiyaunan atawa unu-unu na occasion, sabab in perfume iban sin pangari-ngari tartantu ha kabanahan nila halaum sadja sin bay bukun ha guwa’ sin bay.
Ha Parman sin Allahu taala:
قال تعالى (وَلا يُبْدِينَ زِينَتَهُنَّ إِلا لِبُعُولَتِهِنَّ ) سورة النور ، الآية 31.
“And not display their beauty except to their husbands,” Al-Qur’an, 024.031 (An-Noor)
Hambuuk waktu nakalabay hambuuk babae kan Abu huraira (radiyallahu anhu) in hamut niya biya’ hunus (nara in ilung sin mga kausugan) laung niya ha babae yadtu: harap mu pakain ya i-pun sin Allahu taala? Laung niya: harap pa Masjid, laung hi Abu huraira: nagpahamu-hamut kaw? Laung niya: huun, Laung hi Abu Huraira: Balik kaw panghugas hasupaya maig in hamut sin perfume mu, sabunnal tuud diyungug ku in Rasulullah ( Sallallahu Alayhi Wasallam) namung: “ Di’ Taymaun sin Allahu taala in sambahayang sin babae gumuwa’ pa Masjid – In hamut niya biya’ hunus- sahingga nakabalik siya pa bay, na’, hiyugasan niya na”. (Abu Da-ud [4174], Ibn Ma-ja [4002] and Ibn Khuzaimah [1682]).
Hahambuuk bayta’ Tiyap-tiyap mata, maka hinang sadja zina (yadtu zina sin mata), in babae apabila mag-pahamut hamut ampa makalabay ha majlis, in siya biya’ haini iban biya’ haini (maksud niya makahinang zina). (Abu Da-ud [4173], Tirmizi [2787] and Ibn Khuzaimah [1681]).
In paghamut hamut haq sin bana, Adapun ha dugaing hiyaram sin Sara’.
Amuna ini in piyag-iyan sin Rasulullah (Sallallahu alyhi Wasallam):” Sabunnal tuud in Allahu talaa liyukis niya ha anak apu’ a-dam in suku’ niya dain ha zina, way buli rapat mahinang niya ra, in zina sin mata amuna in pangatud, In zina sin dila’ amuna in lagtik niya, In pangatayan amuna in maghuna’ huna’ iban mag-angan angan, in awrat amuna in sumabunnal kaniya atawa mamuting kaniya”. (Bukhari [6243], Muslim [2657], Abu Da-ud [2152] and Nasa fi tuhfa [13573]).
Laung hi Ibn Abbas (radiyallahu anhuma): In zina sin duwa mata amuna in pangatud, In zina sin simud amuna in pagsiyum (sin bukun halal kanila), in zina sin duwa lima amuna in pagkaput (ha hiyaram sin Allahu taala), In zina sin duwa siki amuna in pagpanaw (pa hiyaram sin Allahu taala), Sabunnalun iban himutingun bang makaabut pa awrat, Bang mabut na pa awrat maitung na siya zina (amun dusa dakula’), Bang di’ pa mabihadtu masi pa dain ha mga dusa hasibi’.
In mga zina nasabbut yan amuna yan in nasabbut ha Parman sin Allahu taala:
قال تعالى : (الَّذِينَ يَجْتَنِبُونَ كَبَائِرَ الإثْمِ وَالْفَوَاحِشَ إِلا اللَّمَمَ( سورة النجم ، الآية 32
“Those who avoid great sins and shameful deeds, only (falling into) small faults,-“. Al-Qur’an, 053.032 (An-Najm)
In AL-LAMAAM (اللَّمَمَ) Katan dusa hasibi’, di’ maagad in zina sabab in ini dusa dakula’ amuin aun haad niya di ha dunya iban aun tungbas niya siksa’ ha adlaw Mahuli.
Naasubu hi Abu-Hurayra (radiyallah anhu) ha tungud a-yat nasabbut sin Allahu taala AL-LAMAAM (اللَّمَمَ) laung niya: Amuna in siyum, kindat, pangatud (pa hiyaram sin Allahu taala), Apabila laung niya magbak in duwa siyunnatan in yadtu zina (dusa dakula’).
Hataman namu’ in bissara namu’ sin Hadith sin Rasulullah (Sallallahu Alayhi Wasallam) manunjuki pa topic ini.
قال رسول الله صلى الله عليه وسلم : ( لأن يطعن في رأس أحدكم بمخيط من حديد خير له من أن يمس امرأة لا تحل له ) رواه الطبراني وغيره ، وحسّنه الألباني في الصحيحة برقم336
Hatiniya:
Sabda sin Rasulullah (Sallallahu Alayhi wa sallam): “Bunnal tuud, labi marayaw in tugsukun (tukulun) in Uh (head) in hambuuk daing kaniyu sin basi’ daing sin kumaput siya pa babae bukun halal kaniya”. ( Attabara-ni, Laung hi Sheikh Albani: Hadith Hasan, pg.336).
Laung hi Sheikh Albani (Rahimahullah) : Ha Hadith ini tiyatagamahan siksa’ mapangsan in hisiyu-siyu kumaput ha babae bukun halal kaniya, iban dalil (basis) haram in magsalam (shake hands) iban babae, sabab nalangkum niya in kumaput ha babae wayruun pagduwaruwa, sambil tiyukas sin Allahu taala kamatauran bangsa muslimeen ha waktu bihaun lamud na in mga sila nagdara panghati.
Mahuli mangayu’ kami kamaapan bang aun magkabassa niyu masakit ha pangatayan dain naman ha tagna’ pagpost namu’ sambil bihaun, Wallahi bukun tuud tiyuud namu’ atawa aun miyaksud namu’ malaingkan in maksud namu’ hikarayaw sin tiyap-tiyap hambuuk dain katu’ latun na pakatan ummat islam, in kami ini manusiya’ sadja magkasa’, bang aun makawa’ niyu kapaiddahan, imamu hapamandu’ sin Qur’an iban Hadith sin panghu’ natu’ Muhammad (Sallallahu Alayhi Wasallam) in yadtu tawfiq kamu’ sin Allahu taala iban kalabbiyahan dain Kaniya.
Wasallallahu ala sayyidina Muhammadin waala a-lihi waasha-bihi wasallama tasliman kathira’ walhamdulillah rabbil a-lameen
