Zhaprokahan Asmawil
Assalamu alaykum pa manga kaguruhan sin kami. Yari kami mangasubu kaniyu. Aun kunu' pag-iyanun sujud sukul? Mura-murahan kajawaban ha masamut ini. Magsukur kaniyu..
Jawab:
Tadjuk Lawihan
Wa alaykumus salam...In sujud sukul nahinang sin Rasul (sallallahu alayhi wassallam) iban sin kasahabatan niya ( radi allahu anhum ), Hadith bayta' kan ABi Bakrah (radiyallahu an);
"In kaawnan sin Rasul(sallallahu alayhi wassallam) apabila siya datungan suysuy makakuyag, magtuy siya magpatiligad sumujud pagsukul pa Allahu Ta'ala (Tirmidhi), hi Abu Bakar Siddiq (radiyallahu an) simujud siya pagsukul ha waktu dimatung in suysuy nabunu' na in Musaylamah Al kadh-dhab iban naraug nila na in Yamamah".
Ampa in sabab sin sujud sukul apabila kaw datungan nihmat biya' sin wayruun anak mu sin pila tahun na kamu nagtiyaun ubus dihilan kaw sin Allahu Ta'ala rizzikih anak, na! sunnat kaymu sumujud kaw sukul pa Allahu ta'ala, atawa kiyaulian kaw dain ha sakit, atawa aun nalawa' kaymu ubus kiyabakan muna, atawa aun kita' mu tau nagmama'siyat ubus sumujud kaw sukul pa Allahu Ta'ala sabab in ikaw hidayatan niya pa kabuntulan.
Ampa in hantang niya subya kaw halaum kasutsi, kiyatatabunan in awrat, harap mu pa kiblat sumujud, ubus ampa kaw tumakbir sumujud makaminsan mamudji kaw iban dumuwa'a pa Tuhan, ubus ampa kaw tumakbir lumingkud ha di' nakaw magtahayat iban sumalam.
In sujud sukul bukun siya halaum sambahayang... wallahu a'lam...
