Maira Alpasain
Assalamu alaykum kaniyu katan di ha tiranan maunu-unu na kamu yan. In aku ini mangasubu kaniyu manga taymanghud.
Unu marai' laung in hukaman niya bang magtulak-tulak (magbiyahi) pa dugaing hula' ubus in layu' manga 1000 Km? Unu marai manjari minum atawa kumaun minsan da kuman tiyu'-tiyu'? Sa' bukun niyat ba'talan in puasa. Manjari da marai? di'da baha marai' maba'tal in puasa atawa kan maba'tal na tuud siya. Maap man kaniyu katan bang aun way imamu ha himumungan ku yan. Kamaya' kamu'. Jazakallahu khair...
Jawab:
Ibn Shaakir
Wa alaykum mussalam wa rahmatullahi wa barakatuhu. Jiyari kaymu muka' bang kaw ha pagtulak-tulakan (Musafir), ganti-an mu ra kuman ha dugaing bulan pila-pila adlaw na in kiyabuka-an mu. Malayingkan bang kaw namu-asa labi marayaw yadtu kaymu, ha farman sin Allahu Ta'aala, ha Suwrah Al-baqarah, ayat 184
:قال تعالى: (... فَمَنْ كَانَ مِنْكُمْ مَرِيضًا أَوْ عَلَى سَفَرٍ فَعِدَّةٌ مِنْ أَيَّامٍ أُخَرَ...) سورة البقرة, آية 184
Parman sin Allahu Ta'ala:
"Hisiyu-siyu in ka-awnan niya nasasakit (sakit mapangsan) atawa duun ha tulakan (bang siya mamuka'), na' bilangun niya in mga adlaw kiyabuka-an niya, ha dugaing bulan". (Suwrah Al-baqarah, ayat 184)
In hinapusan sin ayat:قال تعالى: (...وَأَنْ تَصُومُوا خَيْرٌ لَكُمْ إِنْ كُنْتُمْ تَعْلَمُونَ ...) سورة البقرة, آية 184
Parman sin Allahu Ta'ala:
"Iban bang niyu piyu-asahan (misan kamu ha tulakan), labi marayaw kaniyu, bang niyu sadja kiya-ingatan".
Alaa kulli haal, in Agama ta Islam way kita piyasigpitan, dihilan kita pagbaya', bang kita ha tulakan jiyari katu' muka' atawa talusun / (continue-hun) in puasa gantian ha dugaing bulan. Mabilang in tau Musafir (magtutulak-tulak), apabila in layu' sin tiyulak niya 83 kms. pa taas, in 1000 kms. malayu' tuud, bang daganun sin sasakatan tunga' adlaw kulang labi, sarta' mataud kaligapan mu ha waktu yaun.
Ha pangasubu mu taimanghud(sis) Maira, sibu' da in kimaun kaw tiyu'-tiyu' iban mataud ba'tal na in puasa mu ha piyagtuuran. Subay mu ingatun bang kaw ha tulakan, jiyari kaymu muka' (di' mamu-asa), malaingkan bang isab kaya pa, labi marayaw in di' mu ba'talun in puasa mu, biya' na sin nasabbut natu' ha taas.
Wallahu a'lam bissawab...
