Pangasubu:
Rahsia Hakikat Insan
Assalamu alaykum manga taymanghud ku. Aun ini tiyu'-tiyu' pangasubu,..biyadiin baha' in kumila pa Tuhan? Bang ta siya kakilahan hisiyu baha siya salta' unu tuud siya? Yadtu sadja in pangasubu ku.. Magsukul pa amu in magjajawab. Salam kasilasa pa tiranan ini, saplag pa katan.
Jawab:
Abu AbdirRahmaan
Bismillahi walhamdulillah wassalatu wassalaamu 'alaa Rasulillah...
Tumtumun natu' in ALLAH di' duma magbissara ha manga manusiya' , malaingkan Rasul pini' niya, parman sin ALLAH :
وَمَا كَانَ لِبَشَرٍ أَنْ يُكَلِّمَهُ اللَّهُ إِلَّا وَحْيًا أَوْ مِنْ وَرَاءِ حِجَابٍ أَوْ يُرْسِلَ رَسُولًا فَيُوحِيَ بِإِذْنِهِ مَا يَشَاءُ إِنَّهُ عَلِيٌّ حَكِيمٌ
Iban bukun in ka’awnan sin manusiya' mapatut siya dahun sin ALLAH magbissara malaingkan labay daing ha wahiy atawa daing ha taykud sin hijab(tampan) atawa magpara siya Rasul sarta’ pana’ugan wahiy daing ha panugut niya sin unu-unu na kabaya’an niya. Sabunnal tu’ud in Siya nakatata’as daing ha katan piyapanjari niya (sibu’ da ha Jat niya atawa Kangan-nganan iban kasipat-sipatan niya,lamud na in pagkallam niya nasabbut ha ayat ini. Wayru’un simibu’ kaniya misan hambu’uk unu-unu daing ha piyapanjari niya sarta’ landu’ ma’ingat ha pagparinta niya ha manga piyapanjari niya [Ash-Shuwra:51]
In maksud,, bugtu' in parsugpatan natu' iban sin ALLAH,, wayru'un chance amu'in directly kakilahan natu' in ALLAH. Bukun in parsugpatan natu' biya' sin Rasuwl/ Nabi, atawa biya' kan Musa(alayhis salam) maglaung-sambung iban sin ALLAH. Amura kuman in parsugpatan sin Tag-Iypun iban sin Iypun, na, ha ibadat labi luba' na ha sambahayang iban duwa'a.
DaIng ha sabab yan, in pagkila ha "ALLAH" di' masampurna' malaingkan labay daIng ha Nabi atawa Rasul amu'in piyara sin ALLAH, biya' na sin nasabbut ha ayat, in karasulan sin ALLAH nagdaraa Risala daing kaniya. In risala ini nagdara sin manga habal /bayta' ha tungud ha ALLAH bang hisiyu Siya, unu in kabaya'an Niya, unu in di' Niya kabaya'an iban na sin kaibanan pa(etc.). In hinapusan risala sin ALLAH diyaraa sin hinapusan Nabi amuna in Al-Qur'an iban Sunnah.
Bang bihadtu, di' masampurna' in pag-ingat pa ALLAH malaingkan labay daIng ha pagpangadji' sin Al-Qur'an iban Sunnah, sarta' di' masampurna' in panghati ha Al-Qur'aan iban Sunnah malaingkan labay daing ha panghati sin Rasulullah (sallallaahu 'alayhi wa sallam) iban pagpaham sin manga sahabah niya.
Hisiyu-siyu in malling daing ha panghati sin Rasulullah (sallallahu 'alayhi wa sallam) iban sin sahabah niya, labi-luba' na ha pagkila pa ALLAH, na! sila na yan in nag-i-ingat-ingat daIng ha Rasulullah (sallalahu 'alayhi wa sallam) iban sin manga sahabah niya, sarta' sila na yan in halaum kalaungan ha karna' timaykud sila daing ha Al-Qur'aan iban sunnah iban pamaham sin manga sahabah.
Adapun in hadith "man 'arafa nafsahu faqad 'arafa rabbahu(hisiyu-siyu in naka'ingat ha baran niya tantu tu'ud kiya'ingatan niya in tuhan niya". Na in hadith ini bukun hadith mattan sumagawa' hadith hinang-hinang, hadith wayru'un kasabunnalan niya.
Wallaahu a'lam bissawaab.
